by Jacqueline David. Posted on July 18, 2013, Thursday
KUCHING: Pelilih menua Simunjan seruran betapi enggau penanggul suntuk ai datai ke sehari tu, taja pan di sekeda pelilih menua nadai agi betapi enggau penanggul kemarau.
Seiku orang ke diau di pelilih menua Simunjan (enggai nama iya disebut ditu) madah enti nitih ari kemari, Opis Kereja Raya (JKR) bisi nganjung ai ngagai sebuah sekula enggau sekeda genturung pendiau enggau rumah panjai di pelilih menua nya tang nitihka jam, antara pukul 3 pagi ngagai 7 pagi, enggau 4 lemai nyentuk ke 9 malam.
Ku pengajar di sebuah sekula di Simunjan madah, penanggul suntuk ai nya nyadi belabuh ari ujung bulan Jun tu tadi datai ke sehari tu.
"Pelaba aku, tu nyadi ketegal tangki ai Water Board Simunjan udah rangkai, ai enda chukup tetapika penyampau mensia mayuh ke diau di Simunjan," ku iya.
Tandu iya, pekara nya nyadi dipelaba bisi sebuah palan alai nimbun ai udah puang dikena ngemansangka Radar TUDM, dipelabaka projek seiku pemesai menua nya.
"Sekula suntuk ai, genturung pengentap pendiau Melayu, rumah panjai, pasar semua betapi enggau suntuk ai. Rumah panjai nyangka muntang mimit laban bisi sungai enggau ai ari bukit.
"Ai terejun pan udah langkang, kayu udah ditebang….Nya dipelaba ngempang pejalai ai ti ngujungka menua Simunjan nadai ai," ku iya.
Iya nandu baru, JKR bisi nganjung ai ngagai sekula ke endur iya ngajar ke ngembuan 10 buah tung ai 1Malaysia, ba genturung pengentap pendiau Melayu, abis mayuh dua buah tung ungkup sebuah genturung pendiau, lalu di sebuah rumah panjai diberi dua tung.
"Enti nitih, penyampau tung ke diberi nya enda chukup. Tang ai ke dianjung semina kena nyumai enggau ai irup aja. Nasit bisi ujan dua hari tu ke udah, nya ke ditimbun kena mandi, kena bebasu gari," ku iya.
Tim BAT (Borneo Post Adventure Team) bedau lama tu tadi bisi mansa Simunjan, ngetu dia enda lama sereta mendingka sada mensia mayuh dia sida madahka diri betapi enggau penanggul suntuk ai (Dalam surat berita The Borneo Post hari Dua tu tadi).
Utusan Borneo nguji telefon Kaban Kunsil Nengeri (ADUN) Simunjan Datuk Naroden Majais, minta timbal iya bekaul enggau penanggul nadai ai di Simunjan sereta nanya iya chara perintah deka mutarka penanggul nya ngambika badu nuntung rayat, tang enda mujur.
- Next Entry >>
To enable your comment to be published, please refrain from vulgar language, insidious, seditious or slanderous remarks. This includes vulgar user names.
Tiada ulasan:
Catat Ulasan