SIMUNJAN: Menteri ba Opis Menteri Besai ke mega Kaban Parlimen Batang Sadong Nancy Shukri mujur bejadika Serakup Gempuru Orang Indu Sarawak (PPWS) pampang Ulu Simunjan di Balai Mensia Mayuh Kampung Semalatong malam ensanus.
"Pengawa numbuhka pampang PPWS di menua pesisir mandangka pengulih gerempung ke ukai dikuasa perintah (NGO) tu ngangkatka tikas pengidup raban orang indu di Sarawak.
"NGO tu deka megai tanggungpengawa nentuka orang indu sereta semua komuniti di menua pesisir enda tinggal ari atur pemansang ke majak nyadi diatu," ku iya ba jaku bejadi pengawa.
Kelimpah ari nya, Nancy mega madah tiap iku kitai patut enda ba tikas ke sama ba timpuh ke lama lalu patut ngatur ubah ba pendiau diri sejalai enggau pemansang orang bukai.
Ku iya, tanggung pengawa orang indu diatu majak mar ke alai sida semina ukai bejalaika pengawa nyadi bini tang diatu bela megai pengawa ngangkatka tikas ekonomi ruang bilik.
"Berindik ari nya, PPWS patut beratika pekara tu enggau silik lalu ngiga jalai dikena nyikap orang indu ulih napi tanggungpengawa sida nengah program ke engkeman," ku iya.
Nengah bemacham insentif ke disedia dalam Bajet 2014 nyengkaum Wang Turu Orang Dagang (Graduate), Skim Pemun Dagang Bumiputera, Amanah Ikhtiar Malaysia (AIM) sereta Wang Turu Gempung Orang Dagang Tekun, aku pechaya semua tu ulih mantu orang indu , tandu iya.
PPWS di Pelilih Simunjan diatu udah numbuhka 11 pampang baru nyengkaum di Sibau Rumbau, Isu Baru, Isu Lama, Isu Jaya, Isu Sedia sereta Isu Semebang.
Diatu, Pelilih Simunjan udah bisi 49 pampang PPWS.
Tiada ulasan:
Catat Ulasan