by Jacqueline David. Posted on November 4, 2013, Monday
KUCHING: Beserimbai enggau Ops Cantas ti belabuh digaga ari bulan Ogos tu tadi, polis mujur nangkap kes besai baka ulah ngelalai senyata api ujung minggu tu tadi, alai ketetiga kes nya nyadi di Kuching, Serian enggau Batu Niah, Miri.
Sapit Kepala Polis, Dato Law Hong Soon madah, Ops Cantas deka terus digaga ninting maya lalu dipelaba mayuh agi kes ngembuan senjata deka dirampas.
Kes keterubah, ke dikira kes besai nyadi kena 2 November urung pukul 12.15 pagi, seraban polis ari Opis Penyasat Pengawa Salah enggau Narkotik, Indu Opis Polis Kuching (IPK Sarawak) lebuh nerima penerang ari mensia mayuh, ngipa belalai ba sebengkah endur di Chonglin Park, Jalai Tabuan ditu ke alai dua iku lelaki China ditangkap laban ngembuan senjata sereta ditemu positif dadah.
Asil ipa nya, polis mujur nangkap seiku lelaki mekanik, 32, enggau seiku agi, ke enda gawa, 38, ke ditemu nyimpan dua puchok pistol Revolver ke dipelaba gaga diri enggau 5 igi seterum .38 sereta ditemu positif dadah.
Lelaki ke enda gawa nya, lebuh diperesa, ditemu kala ngembuan rikut kena tangkap nengah Seksyen 307 ketegal nguji munuh orang dalam taun 2009.
Kelimpah ari nya mega, polis mujur ngerampas butul plestik ke ngundan 23 igi pil bechura kelabu ke dipelaba sebansa dadah 'Ecstasy' ke dipelaba dalam pemerat 6.90 gram.
Law madah kes tu benung ditasat nengah Akta Senjatapi, iya nya siti penalty berat 1971.
Enti ditemu salah, orang tu tau diukum jil pengelama 14 taun lalu kena sipat enda lebih ari 6 kali.
"Kelimpah ari nya mega, polis nasat nengah Seksyen 39a (1) Akta Dadah Merbahaya 1952 enggau Sekysen 15 (1) (a) Akta Dadah Merbahaya ba kededua saspek nya laban seduai ditemu gian dadah.
"Enti seduai ditemu salah nengah Seksyen 39a (1) Akta Dadah Merbahaya, reti nya seduai deka kena jil entara 2-5 taun lalu disipat entara 3-9 kali, nitihka pemerat kes nya….Ba pemutus nya, bepanggai ba kot," ku Law.
Ba Kes Kedua, bekaul enggau senjata api ke bisi kena rampas kena 2 November urung pukul 1:15 ngalh hari, seraban polis ari Indu Opis Polis sitak Serian lebuh nerima penerang ari mensia mayuh, meresa sebuah langkau di Kpg Ensebang Pelaie, Balai Ringin, Serian.
Dalam ipa nya, polis mujur nemu sereta ngerampas sepuchok senapang patah ke dipelaba digaga diri enggau dua igi seterum (12 Bore) lalu dipelaba udah diubah baru ke digaga nitih pemesai seterum.
Ba ipa nya, seiku lelaki bansa Dayak, 30, lalu dipelaba datai ari Indonesia ditangkap, lalu maya ditanya polis tuju iya nyimpan senapang patah nya laban kena iya ngasu, ku iya.
"Tang kami agi nasat, sekalika cherita iya amat tauka enda kelimpah ari mansik rikut bukai enti iya bisi kala ngaga pengawa salah di menua tu.
"Ba kes tu, lelaki nya deka ditasat nengah Seksyen 8 (a) Akta Senjata 1960 lalu enti ditemu salah, iya tau kena jil enda ngelui 7 taun sereta diukum enda lebih ari RM10 ribu tauka kededua iya sekali," ku iya.
Kelimpah ari nya, saspek nya mega kena tan nengah Akta Imigresen laban meda iya ari menua sepiak.
Entudi kes nya, sebengkah kes Senjata Api gaga diri mega ditemu kena 1 November alai maya kes tu nyadi, polis begulai enggau ijinsi bukai (MPOB, PDRM, Imigresen, JPN) bejalaika Operasi Bersepadu mutarka penanggul kes riput buah sawit kena churi, ke diterima ari kompeni sawit tauka orang ke bekebun sawit, bekaul enggau mayuh kes churi ke nyadi di sebuah kebun sawit di Batu Niah, Miri.
Dalam kes tu, maya meresa kebun sawit nya, Law madah kelimpah ari buah sawit kena churi, bisi mega orang ari menua luar diambi gawa di kebun nya ke diambi gawa chara salah, deka putarka MPOB.
Polis mega mujur tetemu sereta ngerampas sepuchok senyata api digaga diri sereta 5 igi seterum.
"Kelimpah ari nya, kami mega tetemuka sebilah pedang Samurai, dua bilah duku 52cm enggau 50cm.
"Enti ngumbai samurai nya dikena mutung buah sawit, enda patut. Enda kala orang ngambi buah sawit ngena samurai…Nyangka bisi dikena tuju bukai," ku Law.
Dalam kes tu, polis mujur nangkap 5 iku lelaki beumur entara 31-48 taun ari menua tu empu, lalu sida tu tau tinggang seksyen 8 (a) Akta Senjata 1960.
Enti udah ditinggang penyalah nya, sida iya tau kena ukum enda lebih ari 7 taun sereta diukum enda lebih ari RM3,000 tauka kededua iya sekali, nitihka perintah kot, ku Law.
Sida tu mega ku Law, tau (diukum) nengah Seksyen 6(1) Bahan-bahan Kakisan enggau Senjata Api 1958, lau enti ditemu salah, tau kena jil 2 taun nyengkaum disipat.
Law madah, taja pan tikas pengawa salah di Sarawak enda ngenakutka tang pansik, peresa 'Ops cantas, Operasi Bersepadu' betuaika Opis Luyar Menua deka terus digaga, kelimpah ari polis minta bantu mensia mayuh madah ngagai sida iya enti bisi tetemuka pengawa salah nyadi ngelingi sida iya.
- Next Entry >>
To enable your comment to be published, please refrain from vulgar language, insidious, seditious or slanderous remarks. This includes vulgar user names.
Tiada ulasan:
Catat Ulasan