BEJADIKA PENGERAMI: Anyi, Asing enggau Kijan (tengah) ngulu bala Komiti Pengatur Pengerami melah kek Mantar Krismas.
MARUDI: Kering semengat begempung dalam SPDP (Parti Progresif Demokratik Sarawak), reti nya kering mega semengat begulai dalam gempung Barisan Nasional (BN).
Nengah pengawa ngintu pengerami Mantar Krismas sereta nyambut Hari Krismas ninting taun, reti nya kitai sama ulih nerima pangan diri seraya pengawa ngedutka kaul ba kitai.
Pia ku sekeda pekara ke dipansut Kaban Parlimen Baram, Anyi Ngau maya ke macha teks jaku ari Menteri Kanan ke mega Menteri Pemansang Rama, Tan Sri William Mawan Ikom lebuh bejadika Pengerami Mantar Krismas SPDP, ke diatur Pampang Indu SPDP Marudi begulai enggau Bagi Telang Usan ba Dewan Suarah Baram, malam ensanus.
1,000 iku kaban SPDP ngulu pengerami makai lemai nya. Bepelasarka gaya politik diatu, semua komponen parti enggau bala ketuai BN deka betapi enggau pemar sereta patut ngembuan juluk ke patut dijapai parti.
Ku Anyi, nengah juluk baru komuniti kitai ba serata menua patut ngembuan tikas pemujur ti ngemegahka ati. Tanggungpengawa nyadi ketuai ukai mudah laban deka mai sereta ngerembaika pemansang lalu bekunda ungkup rayat kelebih agi sida ke diau di menua pesisir. Nya meh juluk besai di deka dikemujurka BN nyerumba taun 2020.
Diatu kami chakah gawa deka ngemansang bansa sereta ngangkatka bala nembiak rebak baru. Tanggungpengawa tu begunaka sukung ari komuniti, ke alai nembiak rebak baru patut begempung sereta nyempilka diri enggau perintah Barisan Nasional, ku iya.
Ku Anyi, nengah pengerami makai lemai ke diatur nya mega ulih ngeringka kaul dalam SPDP ti pulaika pemaik ngagai BN.
Kemanahka agi kaul sereta sungkakka meh sukung ngagai BN, laban pekara nya deka mai pemaik ngagai semua rayat di Baram. Nya meh kebuah rambai jaku pengerami kitai malam tu "Moving Forward as One", ngambika kitai chakah agi ngulihka sukung, laban maya PRN13 tu tadi, BN semina teulihka 194 majoriti undi aja, pia ku Anyi ke baru ba penggal keterubah nyadi Kaban Parlimen Baram.
Berebak enggau nya, Anyi mega nerima 500 iti pom peminta nyadi kaban SPDP ari Ketuai Puteri SPDP, Josephine Duyuk Tuah.
Mayuh bengkah main bisi diatur kena ngerami malam nya baka ngajat, belagu karaoke lalu ke penudi endar iya nya Pekit Kumang Mantar Krismas 2013, ke alai Jacqueline Gau, 16 taun, ari Rumah Selat, Sg Pasir udah dipilih nyadi Kumang Mantar Krismas SPDP.
Ivony Lawai bulih lumur dua ditangkanka Sophia Tijan Philip, lumur tiga.
Perais sinu ati diberi ngagai Patricia Welma Nelson Munan enggau Nur Safikah Zainal.
Sama bisi ngulu pengerami nya, Sekreteri politik Kepala Menteri, Kijan Toybee, Chairman SPDP Pampang Marudi, Alexander Asing John Sadai, Chairlady SPDP Marudi ke mega Komiti Pengatur Pengerami, Theresa Gelang, Ketuai Nembiak SPDP, Robert Ayu, SAO Rose Edward Tarang, Ketuai Putera SPDP, Tonny Cheng enggau bala ketuai raban bansa ba kandang menua nya.
To enable your comment to be published, please refrain from vulgar language, insidious, seditious or slanderous remarks. This includes vulgar user names.
Tiada ulasan:
Catat Ulasan