by Rengenyan Labang. Posted on July 17, 2013, Wednesday
TERIMA KASIH: Linggi (dua kiba) ngarika DCF nerima dokumen serah sebuah rumah kedai di Lubok Antu ari ASSAR ti diarika Bujang Nor (dua kanan), seraya dikemataka Jabu enggau Manyin (kiba). — Gambar Kong Jun Liung
KUCHING: Raban ASSAR baka ti ditetapka perintah nengeri, udah meri sebuah rumah kedai di Lubok Antu ngagai Yayasan Kebudayaan Dayak (DCF) kemari.
Pengawa nyerahka rumah kedai nya kemari disuaka Chairman ASSAR, Tan Sri Bujang Nor ngagai Managing of Trustee, DCF, Tan Sri Datuk Amar Leonard Linggi Jugah sereta dikemataka Sapit Kepala Menteri Datuk Patinggi Tan Sri Alfred Jabu Numpang.
Lebuh bejaku ba pengerami nya Jabu madahka diri temegah ati ngagai ASSAR ti meri sebuah rumah kedai ngagai DCK di Lubok Antu.
"Kitai (DCF) beterima kasih sereta temegah ati ngagai ASSAR laban ti meri peluang enggau ruang sebuah rumah kedai ngagai DCF di Lubok Antu, tu ulih mantu ngenyungkakka penatai pemisi DCF sereta komuniti Dayak di menua pesisir (Lubok Antu) dalam ekonomi enggau pelajar," ku iya ba pengerami nya ti diatur ba opis iya di Wisma Bapa Malaysia ditu kemari.
Permodalan ASSAR Sdn. Bhd nengah anak kompeni ASSAR Development (Sarawak) Sdn Bhd udah ngemansangka projek ngaga rumah kedai di Pekan Lubok Antu. Projek nya ti tembu taun 2011 nyengkaum ngaga 24 buah kedai dua ringkat.
Senipak enggau juluk perintah nengeri ti ngemeratka pemansang di kandang menua pesisir, Raban ASSAR sebengkah organisasi ti dipaduka perintah nengeri nyungkakka tikas ekonomi raban Bumiputera di Sarawak nengah Amanah Saham Sarawak ti enda ngelaungka peranak menua pesisir ari atur arus pemansang.
Kelimpah ari nya, Jabu ke mega Menteri Pemansang Menua Pesisir lebuh ditanya bekaul enggau projek ngaga indu opis Yayasan Kebudayaan Dayak (DCF), iya madah, langgur penemu palan endur ngaga indu opis DCF udah dikemendarka perintah.
Kediatu ku iya, DCF agi ngiga belanja dikena ngaga indu opis Yayasan nya, ti bepalan di Kota Samarahan.
Jabu ti nyadi chairman pengepun DCF madahka tanah endur ngaga indu opis nya udah diberi perintah nengeri ti bepalan di Kota Samarahan.
"Kitai agi begunaka timpuh endur ngaga pelin sereta agi begunaka penemu ari Unit Perancangan Negeri bekaul enggau atur belanja ngambika kitai (DCF) ulih ngatur nunda pemisi belanja," ku iya.
Tandu iya, langkar rumah indu opis DCF nya deka dipelin ti mungkur semua gaya raban bansa Dayak baka Iban, Orang Ulu enggau Bidayuh.
Menteri Besai Datauk Seri Najib Tun Razak madah ngungkupka sepenyampau RM5 juta dikena ngaga indu opis DCF di Kuching.
"Perintah ngemendarka ungkup belanja sepenyampau RM5 juta dikena ngaga indu opis Yayasan Kebudayaan Dayak di Kuching ti deka dipejalaika bererenggat," ku iya lebuh bejaku ba pengerami Ngabang Gawai Dayak 2012 di Dewan Sukan Tan Sri Datuk Amar Stephen Kalong Ningkan.
Sama datai ngagai pengerami nya kemari, Kaban Komiti Pengarah DCF, Dato Sri Michael Manyin Jawong enggau raban ari ASSAR sereta raban DCF kebukai.
- Next Entry >>
To enable your comment to be published, please refrain from vulgar language, insidious, seditious or slanderous remarks. This includes vulgar user names.
Tiada ulasan:
Catat Ulasan