by Chris Bishop. Posted on January 27, 2013, Sunday
Komiti pengawa bepilih parti betuaika George Lagong deka bejalaika pansik dulu
BEDAU TEMU: Larry (duduk tiga ari kiba) meri penerang ngagai pemberita tembu aum renggat tinggi SWP kemari.
KUCHING: Sarawak Worker Party (SWP) bedau netapka pemutus sekalika presiden Larry Sng deka bediri di sitak parlimen Lubok Antu ba pengawa bepilih besai ke-13 (PRU13).
Ku Larry, komiti pengawa bepilih SWP ti betuaika sapit presiden George Lagong deka bejalaika pansik dulu di Lubok Antu.
"Aku ngelempaika tanggungpengawa nya ngagai komiti pengawa bepilih SWP. Komiti tu deka ngadu pansik lalu meri buah runding ngagai aku.
"SWP deka netap sereta mansutka pemutus nya ba pengujung bulan Februari tu tauka pun bulan Mac. Tu nyengkaum lima agi lis chalun bukai ba lima sitak parlimen ke dipegai Parti Rayat Sarawak (PRS)," ku iya.
Kitai (SWP) mengkang enggau pemutus deka nganjung chalun ba enam sitak parlimen nya, tandu iya.
Iya mansutka jaku tu ba siti aum pengarang berita sepengudah ngulu aum ketuai renggat tinggi SWP ti diatur di indu opis parti nya ditu, kemari.
Lebuh ditanya sekalika iya rawan sepegudah ninga peneka rayat Lubok Antu ti semina deka nyukung peranak Lubok Antu enggau bansa Iban ngarika rayat di parlimen nya, Larry madah iya enggai nyimpul panjai lalu ngelempaika ngagai rayat netapka runding.
"Semua orang ngembuan hak mansutka penemu, aku pan bisi hak ba senentang pekara nya, taja pia aku ngelempaika ngagai rayat Lubok Antu ngaga pemutus," ku iya.
Iya mega madah rintai nama chalun SWP dipansutka tumu ngambika ulih meri awak ngagai parti bekimpin.
Ba kaul bukai, Larry madah SWP semampai nukangka pintu ngagai ketuai sereta raban Parti Kebangsaan Sarawak (SNAP) ke suba masuk parti nya.
Iya mega nyangkal dawa ti madah SWP ngembuan kaul dalam pengawa naburka berita di Radio Kenyalang (RK) ke alai riput polis udah digaga seraban orang nembiak ari parti PRS bedau lama tu tadi.
"Enti amat riput polis udah digaga, kitai patut meri awak ngagai polis bejalaika pansik sekalika pekara nya salah tauka enda.
"Radio Free Sarawak (RFS) ke sebaka enggau RK udah lama ditabur lalu nadai kala diukum, reti nya pengawa naburka RK mega enda salah," ku iya.
To enable your comment to be published, please refrain from vulgar language, insidious, seditious or slanderous remarks. This includes vulgar user names.
Tiada ulasan:
Catat Ulasan