MARUDI: Perambu nyiri Tan Sri Datuk Amar Adenan Satem mangku pengawa nyadi Kepala Menteri (KM) kelima, nganti Pehin Sri Abdul Taib Mahmud nerima sukung rayat kelebih agi di Marudi enggau pelilih mit Baram.
Mayuh setuju iya nya orang ke dipilih Pehin Sri Taib nyiri Adenan endang patut laban Adenan ngembuan mayuh peneleba dalam bidang politik sereta engkeman nyadi ketuai menua bepelasarka pengelandik ke udah dikembuan.
Chairman Serakup Betanam Betupi Pelilih (PPK) Baram Blalang Atom madah, iya ari pun udah nyadang Adenan orang ke nganti Taib.
"Kitai beratika ari sukut peneleba sereta ulah kemerah iya (Adenan) begulai enggau mensia mayuh endang chukup tegap, kelimpah iya seiku orang lama (veteran) dalam PBB.
"Ba aku, iya endang patut lalu kami sigi nyukung penuh Tan Sri Adenan nyadi Kepala Menteri Sarawak kelima," ku Blalang seraya madahka penemu Taib nyiri Adenan endang engkeman sereta beratika semua pekara.
"Berindik ari nya mega, kita ngarapka Kepala Menteri ke baru tu ila deka ngemeratka atur pemansang di menua pesisir sereta nampung kuing Pehin Sri Taib ngemansangka menua pesisir," ku iya seraya meri besai terima kasih ngagai Adenan ketegak udah dipilih nyadi KM.
Penemu Blalang nya mega disukung seiku kaban Kaunsil Pelilih Mit Marudi ke baru aja dipadu ngarika PRS, Kaunsilor Tuai Rumah (TR) Anthony Jelma Teby.
"Iya (Adenan) endang patut ari semua sukut kelimpah ngembuan mayuh peneleba ukai semina ba dalam bidang politik tang mega pemansang negeri tu nyengkaum di menua pesisir, kelimpah ngembuan kaul ke tegap enggau semua piak sereta ketuai Barisan Nasional (BN)," ku iya.
Anthony Kaban Komiti Pemansang Tuai-tuai Rumah Kawasan Poyut/Lubok Nibong ditu mega ngarapka Adenan neruska politik pemansang Taib ke mungkur menua pesisir di serata nengeri ari utara nyentuk ke selatan.
Ba raban bansa Orang Ulu di Ulu Baram, perambu nyirika Adenan sigi disampi laban ku sida, Adenan ukai semina ngembuan mayuh peneleba dalam bidang politik tang mega nemu pengingin ati enggau adat asal bansa Orang Ulu di Baram.
Chairman Pergerakan Pemuda PBB Telang Usan, Dominic Nyurang Ajang, ke besetuju enggau penerang nya madah, PBB di Telang Usan sigi nyukung Adenan ke bisi penau mai Sarawak terus nyingkang ke mua.
"Kitai semina arapka Tan Sri Adenan ulih nampung projek-projek besai ke udah diperambu Pehin Sri Taib, kelebih agi nengah projek Tekat Ai Baram ngambika ulih meri penguntun ngagai semua peranak Baram enggau Sarawak," ku iya mya dikerandau Utusan Borneo ditu, apin lama ke udah.
Dominic mega arapka Adenan neruska pemansang ungkup raban bansa Orang Ulu ke deka sama maju baka bansa bukai di nengeri tu.
Mega nyukung sereta temegah enggau Adenan ke dipadu nyadi Kepala Menteri Sarawak kelima iya nya bala tuai raban bansa di Marudi, ketuai renggat baruh nyengkaum ADUN Telang Usan, Dennis Ngau ke madahka meri sukung penuh ngagai iya.
Tiada ulasan:
Catat Ulasan