Khamis, 17 Januari 2013

11 di lawas sarawak - Google Blog Search

11 di lawas sarawak - Google Blog Search

JPLS: Rayat nengeri tu enda ibuh irau tauka nangi – BorneoPost <b>...</b>

Posted: 16 Jan 2013 03:29 PM PST

by Rengenyan Labang. Posted on January 17, 2013, Thursday

Ai pasang mirah nadai mangka tasik tauka sungai di Sarawak baka ke bisi nyadi ba Sabah

KUCHING: Rayat nengeri tu enda ibuh irau ati pasal fenomena ai pasang mirah laban pekara nya nadai mangka tasik tauka sungai di Sarawak.

Sapit Direktor Opis Pengawa Berikan Tasik Sarawak (JPLS) Bohari Leng madahka, opis iya semina deka matau tasik tauka sungai kandang menua Lawas laban nya besemak enggau tasik Sabah sereta Teluk Brunei.

Taja pia ku iya, rayat nengeri tu patut nemu penerang sereta beratika pekara nya lebih agi bekaul enggau utai idup dalam tasik baka kerang enggau ikan tasik pabu (Ikan Pelagik) ti kena pangka fenomena nya.

"Rayat enda patut irau ati laban ari menya nyentuk ke seharitu fenomena ai pasang mirah nadai ditemu nyadi di Sarawak. Kitai nadai kala nerima riput ari orang berikan bekapal pasal fenomena ai pasang mirah, baka ti nyadi di Sabah.

"Diatu ba Sarawak kitai semina matau Lawas laban kandang menua nya semak enggau ai Sabah enggau Teluk Brunei. Ba pun bulan Januari 2013 kitai udah ngambi sereta mansik chunto ai, kerang sereta ikan tasik pabu di Lawas, lalu asil pansik ditemu hari Lima tu (pagila).

"Rayat nengeri tu enda patut irau ati makai kerang sereta ikan tasik pabu ke bisi dijual ba nengeri tu laban tebal diimport ari menua Semanjung Malaysia," ku iya.

Bohari mansutka pekara nya dalam aum pengarang berita pasal fenomena ai pasang merah ti diatur ba opis JPLS ditu, lemai kemari.

Bejaku baru iya madahka JPLS terus matau ai di Lawas sereta ngerapitka kaul enggau Opis Pengawa Berikan Sabah kena bejalaika pengawa pemansik toksin enggau tikas ai pasang merah di Sabah.

Entara ikan tasik pabu nyengkaum ikan kembung, ikan selar, ikan mata besai, terubok, ikan cincaru, tongkol, ikan bawal sereta ikan tasik pabu ke bukai.

Berebak enggau nya, Direktor Nengeri, Kunsil Pemansang Pengawa Berikan Malaysia (LKIM), Abdul Razak Ahmad madahka nengeri tu meli ikan tasik pabu enggau kerang ari Semenanjung Malaysia, Sabah, Thailand enggau Indonesia.

Taja pia ku iya, kenyau beberapa bulan ti udah kerang ari Sabah nyau majak kurang dibai masuk ke Sarawak, berindik ari pengirau pengimport nengeri tu.

Kerang ari Sabah ke dibai tama kitu dipelaba diambi ari sekeda endur di Sabah ti nadai kena bungkur fenomena ai pasang merah baka di Semporna sereta Tuaran enggau sekeda endur ke bukai.

"Kerang enggau ikan tasik pabu ari Sabah likun sereta tau diempa, laban naka ke diatu kitai nadai nerima riput pasal pekara nya.

"Pemayuh kerang dibai ari Sabah ke nengeri tu bisi kusut, bulan Disember kitai nerima 1.3 metrik tan aja enti dibandingka bulan Oktober bisi empat metrik tan enggau bulan November semina tiga metrik tan. Kitai agi ngambi ikan ari Sabah," ku Abdul Razak nandu baru madahka kerang enggau ikan tasik pabu likun diempa.

Ai pasang mirah iya nya sebengkah fenomena asal ti nyadi ketegal sebengkah tauka dua spesis plankton ti dominan, lalu ai pasang mirah nya ngumpul toksik dalam kerang laban ngembuan sistem pemakai belapis sereta enda mindah.

Nitihka penerang Bohari, di Sabah bisi dua kes bekaul fenomena nya ti udah nabanka nyawa.

"Fenomena ai pasang mirah ti nyadi di Sabah ketegal plankton ti bisi toksik, 'Pyrodinium bahamens var Compressum'. Plankton ke bisi toksik nya ngujungka 'Paralytic shellfish poisoning' (PSP) sereta nabanka nyawa," ku Bohari.

Sama bisi ngulu aum pengarang berita nya kemari, pengari ari Opis Pengerai Nengeri Sarawak Wilbert Kho Lee Chai.

To enable your comment to be published, please refrain from vulgar language, insidious, seditious or slanderous remarks. This includes vulgar user names.
Dicatat oleh di

Tiada ulasan:

Catat Ulasan

Langgan: Catat Ulasan (Atom)

ads