![](http://cdn.theborneopost.com/newsimages/2013/12/pix100002536.jpg)
'KIBUNG PADI': Lemambang enggau raban iua benung miring ba 'Kibung padi' ba umai nya.
![](http://cdn.theborneopost.com/newsimages/2013/12/pix100002538.jpg)
GAYA TAUN DIATU: Tu meh gaya taun di Marudi naka ke diatu.
MARUDI: Tubah mayuh bansa Iban ke bedau masuk agama keristin sereta ngemeranka adat lama lalu pia mega mayuh bepanggai ba mimpi enti deka ngereja sesebengkah pengawa sehari nya.
Nya meh kebuah diatu agi tubah kita tepedaka raban Iban ngemeranka pengawa serta adat miring lebuh ngelaluka pengabang tauka penatai orang ke benama baka sida Menteri enggau temuai ke bepangkat besai lebuh niki rumah panjai maya bisi pengerami besai.
Sebedau niki sigi diasuh miring dulu baik nya ba kaki tangga tauka kaki lima rumah panjai nya, baru sida dikemendar niki tauka masuk rumah sereta dibiau enggau manuk labang tauka biring.
Empai lama ke udah, Pengarang Berita Iban bisi dikanggauka seiku orang ke ngemeran pengawa bumai lalu dibai ngemata ke pengawa "ngintu burung" ba umai iya kira enda jauh ari pasar tu.
Nitihku orang bumai nya iya ke dikelala enggau nama "Nyadang anak Tabor" ari Rumah Panjai Gudang, Marudi, dalam taun tu mega lebuh seduai melaki bini betebas tau ke nasau ba umai taun tu, tak enda memukai iya tetemuka seiku ular Ripong ti tau ke burung betaun lalu enti kena intu tau mai tuah ngagai orang ke ngempu umai.
Kemari, kami enggau kaban belayan ke semak enggau seiku orang tuai ke landik miring dibai ke umai iya awak ke pengawa ngintu burung nya dipenyadi nitihka genap agih piring.
Enti enda salah ingat aku, pengawa miring nya patut diatur ba senentang endur "Kibung padi" maya sida ke nugal suba lalu udah nya orang ke patut diasuh miring enggau apai tuai orang ke dibai nya tadi. Udah miring ba 'Kibung padi' baru sekeda piring ke udah dipiring bai ngagai endur ke nemu 'Ular Ripong' nya tadi ,lalu bebiau baru ga ba endur nya.
Pengudah piring diatur lalu pengawa pan kira udah tembu, raban ke ngulu diberi makai lalu ngirup utai ke bisi dia iya ke tau diirup. Ukai mina pia aja tang meh enggau manuk mega.
Nyentuk ke seharitu, bansa Iban sebelah Marudi lebih agi ba kandang menua Poyut/Lubok Nibong agi tebal ngemeranka bepengarap tauka adat lama lalu jarang ke masuk keristin.
"Ba anang iran enti pengabang kitai ditiki ngena babi sereta disempulang pengawa miring di kaki tangga tauka ruai," ku Nyadang.
"Intu piring enda sebaka, iya nya nitihka batang ai lalu nitih adat aki ini diri empu. Kami peturun sida Igoh, sida Beraoh, sida Nyegang, sida Buang lalu dititihka sida Unggie ke lama udah lesi laya midang. Diatu pengawa miring kami dipeturun ngagai sida Adam ke dikumbai Tuai Rumah Nawang.
To enable your comment to be published, please refrain from vulgar language, insidious, seditious or slanderous remarks. This includes vulgar user names.
Tiada ulasan:
Catat Ulasan